Սեպտեմբերի 20-ին «Հարմարվողականության ազգային ծրագիր Հայաստանում» (ՀԱԾ) ՄԱԶԾ-ԿԿՀ ծրագրի շրջանակում մեկնարկել է «Դիմակայենք կլիմայի փոփոխությանը» խորագրով դպրոցականների համար նախատեսված մրցույթը: Մրցույթի նպատակն է բարձրացնել երիտասարդների շրջանում կլիմայի փոփոխության հարմարվողականության վերաբերյալ իրազեկվածությունը և ներգրավել նրանց կլիմայի փոփոխության բացասական ազդեցությունները մեղմելու և կանխարգելելու, նաև հարմարվողականության միջոցառումների մշակման գործընթացներում:

Մրցույթին կարող են մասնակցել դպրոցներ կամ այլ կրթական կազմակերպություններ (ակումբներ, խմբակներ, ՀԿ-ներ, մասնագիտացված ուսումնական հաստատություններ և այլն)։

Մրցույթը կանցկացվի երեք անվանակարգով` նախատեսված տարբեր տարիքի մասնակիցների համար.

• Նկարների կամ պաստառների մրցույթ՝  6-14 տարեկան
• Տեսանյութերի մրցույթ՝ 14-18 տարեկան
• Նախագծային աշխատանքների մրցույթ՝ 14-18 տարեկան

Մրցույթին ներկայացված աշխատանքները պետք է լինեն կլիմայի փոփոխության հարմարվողականությանը վերաբերող թեմաների շուրջ, այդ թվում՝ վտանգավոր եղանակային երևութներին ու աղետներին դիմակայում և արձագանքում, համայնքների դիմակայունության բարձրացում, ջրային ռեսուրսների արդյունավետ օգտագործում, մարդու առողջության հետ կապված խնդիրների կանխարգելում, գյուղատնտեսության խոցելիության նվազեցում, անտառների պահպանում, հրդեհների կանխարգելում, կենսաբազմազանության պահպանում, էկոտուրիզմ, բնահեն լուծումների կիրառում և այլն:

Մրցույթն անցկացվելու է երկու փուլով.

• Հայտերի հավաքագրման փուլ, որի ընթացքում ուսումնական հաստատությունները մինչև սույն թվականի հոկտեմբերի 20-ը ներառյալ պետք է ներկայացնեն յուրաքանչյուր անվանակարգում առավելագույնը երկու աշխատանք:
• Եզրափակիչ փուլ, որի ընթացքում  մրցույթի փորձագիտական հանձնաժողովը ներկայացված հայտերից յուրաքանչյուր անվանակարգում կընտրի առավելագույնը տասը լավագույն աշխատանք, որոնք այնուհետ կներկայացվեն մրցույթի եզրափակիչ միջոցառման ընթացքում, որտեղ կընտրվեն և կհայտարարվեն հաղթողները: Եզրափակիչ միջոցառումը, կկազմակերպվի մինչև սույն թվականի նոյեմբերի 15-ը:

Աշխատանքների ներկայացման համար անհրաժեշտ է ներկայացնել մասնակցության էլէկտրոնային հայտ՝ կցելով համապատասխան նյութերը։

Սեպտեմբերի 28-ին և հոկտեմբերի 8-ին ՄԱԶԾ-ԿԿՀ ՀԱԾ ծրագրի փորձագետների հետ կանցկացվեն աշխատանքների նախապատրաստման և ձևակերպման վերաբերյալ խորհրդատվական հանդիպումներ/քննարկումներ, որոնց գրանցվելու համար պետք է լրացնել էլեկտրոնային հայտ։ Հանդիպումների ժամի և անցկացման ձևաչափի վերաբերյալ մանրամասները գրանցվածներին կուղարկվեն հավելյալ:

ՄՐՑՈՒՅԹԻ ԿԱՆՈՆԱԿԱՐԳ

Մրցույթի պայմանների և ընթացակարգի վերաբերյալ հարցերը կարող եք ուղարկել  [email protected]  էլ․փոստով։